| Home > Index > Aaron Zeitlin > A Yidishe Romans |
| Click for translation: English |
|
ײִדישער ראָמאַנס
אוי, דאָרטן שטייט אַ יתום–בוים, אויף קני, אַז וויי אים, שטייט ער — געווען אַ מאָל אַ מייַ בייַ אים, נישטאָ שוין מער קיין צווייטער ! אַ דונער האָט געטראָפֿן אים, געמאַכט פֿון אים אַ הויקער, זייַט דעמאָלט שטייט ער נעבעכדיק און פֿינצטער, מעשׂה–חוקר… רחמנות האָבן פֿייגעלעך און ווילן דאָרט נישט גאַסטן : ער קען נאָך פּלוצלינג אייַנפֿאַלן — וואָס דאַרף מען אים באַלאַסטן ? אוי, עלנט שטייט דער יתום–בוים און אייביק טוט ער קניען, — און דיך זאָל גאָט דערבאַרעמען, אין נחת זאָלסטו בליען ! אַ פֿרישע זייַ, אַ שלאַנקע זייַ, און שאָטן גיב דעם מידן ; ווען ס‘איז בייַ אים דער קאָפּ צעהיצט — באַשיץ אים מיט דייַן פֿרידן. און וואַקס אַזוי, און בלי אַזוי צו הימל און צו לייַטן, ס‘זאָל זייַן אַ קוויקונג אָנצוזען דייַן קעפּל פֿון דער ווייַטן ! נישט שרעק זיך פֿאַר קיין שטורעמווינט, נישט בויג זיך פֿאַר קיין רעגן, — און איך, דער מידער יתום–בוים, וועל קניען דיר אַנטקעגן… |
