נ ײַ ע ר  א ב ר ה ם

 

כ'האָב געזען אַ פעלד און אַ קבר

און דאָס פעלד האָט געשטראָמט מיט בלוט.

איז געקומען צו פליען אַ ספר

און האָט אױפן קבר גערוט,

האָט אױפן קבר גערוט.

 

 

און ס'האָט זיך געעפנט דאָס ספר

װי אַן אױג נאָך אַ לאַנגן שלאָף,

און אין דעם אָפענעם ספר

האָט זיך אַלף געקושט מיט תיו,

אַלף געקושט מיט תיו.

 

און הױך איז פון יענעם קבר

אַרױסגעװאָקסן אַ מאַן,

װי אַ בױם באַשאָטנט דאָס ספר

און געזאָגט: כ'בין װידער פאַראַן.

אָמן!  כ'בין װידער פאַראַן.

 

און דער מאַן האָט גענומען דאָס ספר

און זײַן װאָרט איז געװעזן פלאַם:

איך בין דער נײַער אברהם  ─

און פון מיר קומט װידער גאָטס שטאַם,

פון מיר קומט װידער גאָטס שטאַם.

-----------------------------------------------------------------

לידער פון חורבן און לידער פון גלױבן (א),  (1967) , ז.130