אַמאָל אין פּױלן

                                                           אַ רױז אױפ'ן דאַך,

                                             אַ ליכטיקע נאַכט.    

                                                                              (פון  אַ חדר-ליד)

אָט ערשט  ─  אָט איצט  ─

און ס'איז שױן אַמאָל.

ס'איז  אין צלמות,

דעם טיפן טאָל.

איצט  ─

און שױן אַמאָל,

                   אַמאָל אין פּױלן.

 

װאַרשע. שׂיעננע

זעכציק און נײַן.

דער פאַרנאַכט גיסט אָן

פולע שױבן מיט װײַן.

אױפ'ן שמאָלן באַלקאַן

זײַנען איך און דו  ─   ─  ─

נײן, נישט אמת.

 

נאָר װאו  ─  װאו?

אין טאָל, אין טאָל,

אין טאָל צלמות,

טאָל פון אַמאָל  ─

                    אַמאָל אין פּױלן.

 

אַ לבנה  ─  אַ רױז,

אַ רױז אױפן דאַך.

אַ לבנה אַ רױז,

אַ ליכטיקע נאַכט.

און איך און דו, אין דײַן אױג די רו, און אַ הימל באַשאָטן

מיט גאָלדענע נאָטן  ─

אַלץ שפּילט אונטער דער האַנט

פון גאָט דעם מוזיקאַנט  ─

הער  ─  דו הערסט?

אָט איצט  ─  אָט ערשט  ─

נײן  ─  נײן  ─

ס'איז לאַנג שױן אין טאָל,

אין טאָל צלמות,

טאָל פון אַמאָל.

געװען איז עס אַמאָל,

                      אַמאָל אין פּױלן.

 

פאַרצײַטיקער אָט-ערשט.

אָט-ערשטיקער אַמאָל.

הער אױף, הער אױף,

די בילדער נישט מאָל!

לאַנג, לאַנג איז עס געװען,

לאַנג, לאַנג איז עס געשען,

און פינסטער, טיף און שמאָל

איז דער טאָל פון אַמאָל.

געװען איז עס לאַנג,

אין ערגעץ אַ לאַנד,

אַמאָל, העט לאַנג  ─

                   אַמאָל אין פּױלן.

1946                 

--------------------------------------------------------------------------

לידער פון חורבן און לידער פון גלױבן (א),  (1967) , ז.51